Laert Haxhiu, i dënuar me burgim të përjetshëm në shkallën e parë për “Masakrën e Lushnjes” të vitit 2017, ku mbetën të vrarë dy persona dhe u plagosën dy të tjerë, ka apeluar vendimin në Gjykatën e Apelit të Posaçëm. Në seancën e fundit, ai deklaroi se po dënohet pa fakte dhe pa të drejtë. Avokati i tij, përballë prokurorëve të çështjes, Altin Dumani dhe Doloreza Musabelli, kërkoi riçeljen e shqyrtimit gjyqësor duke argumentuar se SPAK nuk ka kryer hetime të plota.
“Është rasti i parë në historinë e kësaj godine që ngrihet një akuzë pa hetime të plota. Kërkoj caktimin e një eksperti për pamjet filmike të karburantit, për të përcaktuar nëse është Laert Haxhiu në automjet ose jo,” theksoi avokati.
Prokurorët, nga ana e tyre, kundërshtuan këtë kërkesë duke deklaruar se nuk ka nevojë për rishikimin e pamjeve filmike, pasi ato nuk janë prova e vetme dhe gjatë procesit janë dëgjuar dëshmitarë nga të dyja palët.
Seanca u tensionua kur babai i Laert Haxhiut ndërhyri duke bërë gjestikulacione ndaj të birit dhe avokatit, duke i kërkuar të flasin për “të vërtetën e tyre.” Gjyqtari Florian Kalaja ndërhyri duke e paralajmëruar për të ruajtur qetësinë. “Unë jam ai që e vuaj këtë, zoti gjyqtar,” tha babai i 32-vjeçarit të dënuar.
Gjykata vendosi të shtyjë seancën për më 13 nëntor, për të mundësuar një konsultim mes avokatit dhe Haxhiut në ambientet e burgut 313.
Laert Haxhiu është dënuar me burgim të përjetshëm nga Gjykata e Posaçme më 24 prill 2024, për veprat penale që përfshijnë “Grup të strukturuar kriminal”, “Vrasje në rrethana të tjera cilësuese”, “Mbajtje pa leje dhe prodhim të armëve” dhe “Prishje të qetësisë publike”.
