Donald Trump ka arritur të fitojë më shumë vota nga votuesit nën 30 vjeç, një grup tradicionalisht i mbështetur nga demokratët, sipas exit poll-eve të NBC News. Këto rezultate tregojnë se Trump ka mbledhur më shumë vota nga ky bllok votuesish sesa çdo kandidat republikan që nga viti 2008. Ai ka arritur të fitojë mbështetje kryesisht nga meshkujt e rinj, ku ka marrë 47% të votave, me Kamala Harris që ndodhet pak më përpara me 49%.

Në anën tjetër, Trump ka arritur të fitojë pak terren edhe mes grave të reja, megjithatë epërsia demokrate mbetet e theksuar në këtë grup, me Harris që udhëheq me 62% kundrejt 36% të Trump-it.

Një nga çështjet kryesore që ka ndikuar në këtë grup votuesish ka qenë mbrojtja e të drejtës për abort, një temë që ka qenë shumë më e rëndësishme për gratë, ku 4 nga 10 gra e kanë cilësuar si çështjen kryesore. Për meshkujt e rinj, megjithatë, kjo ka qenë një temë më pak e rëndësishme, me vetëm 11% që e kanë renditur si prioritet.

Për këtë grup votuesish, çështjet më të rëndësishme kanë mbetur ekonomia (37%) dhe gjendja e demokracisë (36%), dy aspekte që duket se janë më të rëndësishme për ta sesa çështje sociale si aborti.