Deputeti i PD-së, Asllan Dogjani, ka mbajtur një fjalim të ashpër gjatë seancës plenare të sotme, ku kritikoi ashpër Kryetaren e Kuvendit, Elisa Spiropali. Dogjani e akuzoi Spiropalin për shkeljen e rregullores dhe për trajtimin e padrejtë të deputetëve, duke e përmendur rastin e përjashtimit të 24 deputetëve të opozitës. Sipas Dogjanit, ky përjashtim ishte urdhëruar drejtpërdrejt nga kryeministri Edi Rama, me qëllimin për të penguar fjalën e opozitës dhe për të mbajtur kontrollin mbi Kuvendin.
Ai po ashtu theksoi se largimi i ish-Kryetares së Kuvendit, Lindita Nikolla, nuk kishte të bënte me sëmundjen e saj, por me faktin se Edi Rama kishte kërkuar një “ushtar” në atë pozicion, që të zbatohej urdhrat e tij pa pyetje. Dogjani shtoi se Spiropali ishte emëruar në këtë post për të shkelur ligjin dhe Kushtetutën, dhe për të dëmtuar rendin kushtetues.
“Znj. Kryetare, vazhdoni të shkelni rregulloren. Nuk i ndërprite kohën ministrit që po fliste, ndërkohë që përjashtuat 24 deputetë për të penguar fjalën e opozitës. Kjo tregon se e keni marrë një vendim të paligjshëm për të mos zbatuar vendimet e Gjykatës Kushtetuese, dhe po dëmtoni rendin kushtetues”, u shpreh Dogjani.
Ai i kërkoi Spiropalit të zbatojë rregulloren dhe të mos lejojë që Kuvendi të kthehet në një vend censurimi. “Parlamenti është vend ku bëhet debat, jo censure. Ne do të kërkojmë zgjedhje të lira dhe të ndershme, sepse ju keni ardhur në pushtet me grupet kriminale”, theksoi Dogjani, duke theksuar se opozita do të vazhdojë të luftojë për të mbrojtur fjalën e lirë dhe interesat e qytetarëve.
