Në seancën e sotme plenare të Kuvendit, deputeti i opozitës Luan Baçi u përfshi në një debat të ashpër me Ministrin e Brendshëm, Ervin Hoxha, lidhur me ngjarjen e ndodhur disa javë më parë, kur deputetët e Partisë Demokratike nuk u lejuan të merrnin pjesë në seancë, pasi ishin përjashtuar me vendim të Sekretariatit të Etikës.

Baçi i bëri thirrje mazhorancës për të zbatuar rregulloren e Kuvendit, duke theksuar se forcat e FNSH ishin të armatosura dhe në oborrin e Kuvendit. Ai u shpreh se kjo situatë nuk tregon normalitet, pasi deputetët e opozitës nuk kishin shkuar për të bashkëpunuar, por për të ushtruar të drejtën e tyre të pjesëmarrjes në punimet e Kuvendit.

“Normaliteti ju imponua nga gjykata. Nuk ka nevojë për vendim gjykate, mjafton të zbatoni rregulloren e Kuvendit. Jashtë në Kuvend janë futur Forcat e Ndërhyrjes së Shpejtë. Kanë qenë me armë dhe duhet të mbani përgjegjësi”, deklaroi Baçi, duke kërkuar sqarime për prezencën e forcave të armatosura.

Në përgjigje, Ministri Hoxha, me tone të ashpra, i tha Baçit: “Turp të të vijë”.

Përgjigja e Baçit ishte e ashpër: “Ty të të vijë turp që gënjen ashtu. Harrojeni që mund të kem frikë. Sot nuk ka normalitet, nuk kemi ardhur këtu të bashkëpunojmë me ju. Doni të na zhbëni dhe të vidhni rehat. Nuk ka seancë normale me ju, por vetëm me qytetarët.”

Ky përplasje i dha një dimension më të thellë tensioneve politike mes opozitës dhe mazhorancës, duke reflektuar mospajtimet për mënyrën si po funksionon Kuvendi dhe përdorimin e forcës për të menaxhuar situatën.