Në seancën e sotme plenare të Kuvendit, deputeti opozitar Agron Shehaj ngriti shqetësimin për trafikun e mbetjeve toksike, të cilat sipas tij ndodhen në portin e Durrësit. Shehaj kërkoi shpjegime nga institucionet përgjegjëse, veçanërisht nga ministri i Brendshëm, Ervin Hoxha, lidhur me masat që po merren për të menaxhuar këtë situatë dhe për të informuar opinionin publik.

Ai theksoi se është e rëndësishme që qytetarët të dinë çfarë po bëhet me mbetjet toksike dhe akuzoi qeverinë për mos veprim, duke shtuar se ndoshta gjysma e qeverisë është e përfshirë në këtë skandal të trafikimit të mbetjeve.

Pjesë nga diskutimi:

Shehaj: “Një anije me kontejnerë të trafikuar me mbetje toksike ndodhet në portin e Durrësit dhe ministri i Brendshëm duhet të japë përgjigje se çfarë po bëhet. Nuk u dha asnjë shpjegim. Opinioni publik do ta dijë çfarë po bëhet me mbetjet, të shpjegohet, ta dinë qytetarët.”

(Për intervenimin e Spiropalit)

Shehaj: “Pse ndërprisni, çfarë ju shqetëson? Ju shqetëson sepse gjysma e qeverisë është e përfshirë në këtë skandal, në trafikimin e mbetjeve toksike! Duhet të zbatoni urdhrin e Prokurorisë, çfarë po ndodh me mbetjet? Ju i keni thënë që po mundoheni, s’është e lehtë të lëvizësh 102 kontejnerë? Kur të ketë çështje tjetër do ju informojmë! Po ju nuk mendoni se duhen informuar qytetarët? Nuk ju shqetëson kjo zoti ministër? Mund të na tregoni çfarë po bëni?”

Në përgjigje, ministri Hoxha deklaroi se Prokuroria e Durrësit ka bërë një njoftim publik dhe se bashkëpunon me Policinë e Shtetit, Agjencinë Doganore dhe Autoritetin Portual për të ekzekutuar urdhrin dhe për të siguruar që kontejnerët të zbresin në një vend të sigurt. Ai shtoi se kjo procedurë po ndiqet duke marrë parasysh kushtet e sigurisë dhe siç është kërkuar nga Prokuroria.

Hoxha: “Në lidhje me informacionin e kërkuar, Prokuroria e Durrësit ka bërë njoftim publik në bashkëpunim me Policinë e Shtetit, Agjencinë Doganore, Autoritetin Portual po ekzekuton urdhrin dhe së shpejti do zbresin kontejnerët në vend të sigurt, sipas kushteve dhe çështjeve të sigurisë, në ambientet e Durrësit, siç është kërkuar nga Prokuroria.”

Përgjigja e ministrit përfaqësoi reagimin zyrtar ndaj shqetësimit të ngritur nga opozita, por nuk qetësoi kërkesat për transparencë të opozitës, e cila insistoi se qytetarët duhet të informohen në lidhje me këtë çështje të ndjeshme.