Pamjet e reja nga porti i Shëngjinit tregojnë momentin kur tetë emigrantë, që mbërritën nga Italia, zbresin nga anija “Libra” dhe nisen drejt qendrës pritëse lokale. Emigrantët do t’i nënshtrohen procedurave të verifikimit dhe kontrollit shëndetësor para se të transferohen në kampin e Gjadrit, ku do të vazhdojnë procedurat e rregullta të azilit.

Fillimisht, pritej të mbërrinin nëntë persona. Megjithatë, një emigrant nga Bangladeshi u përjashtua nga udhëtimi për shkak të moshës së madhe dhe gjendjes së dobët shëndetësore.

Kjo shënon dërgesën e dytë të emigrantëve nga brigjet italiane, pasi anija “Libra” u nis nga Lampedusa ditën e mërkurë, në kuadër të marrëveshjeve të menaxhimit të krizës së emigrantëve që mbërrijnë nga Mesdheu.