Reshje të dendura shiu kanë shkaktuar përmbytje masive këtë të premte në rajonin e Katanias, Itali. Sipas të dhënave paraprake, ujërat kanë përmbytur dhjetëra rrugë, duke krijuar një situatë të ngjashme me atë të përjetuar në Spanjë, megjithëse në një nivel alarmi më të ulët. Si pasojë, qindra persona janë bllokuar në makinat e tyre dhe kanë kërkuar ndihmën e autoriteteve.

Situata më kritike është raportuar në zonat Acireale, Catania Nord, Palagonia dhe Maletto. Autoritetet lokale u kanë bërë thirrje banorëve që të shmangin lëvizjet e panevojshme, pasi parashikohet që reshjet e shiut të intensifikohen në orët e ardhshme.

Ekipet e emergjencës civile janë dislokuar në terren për të ofruar ndihmë dhe për të trajtuar problematikat që mund të hasin banorët në këto kushte të vështira.