Policia italiane ka realizuar një aksion të suksesshëm për shkatërrimin e dy grupeve kriminale të trafikut të drogës, që operonin në zonën e Milanos. Aksionet e koduara “Thirrja” dhe “Rivendosja”, të nisura në shtator 2023 dhe pranverën e vitit 2024, kishin në shënjestër një grup të ri kriminal shqiptarësh, me bazë në Neive, Castagnito dhe Magliano Alfieri.

Hetimet zbuluan se grupi kryente trafikim kokaine dhe lëndësh të tjera psikotrope, me anë të të rinjve shqiptarë, përfshirë edhe të mitur, të cilët rekrutoheshin nga organizata kriminale. Anëtarët e grupit, që nuk kishin precedentë penalë, përdornin viza turistike dhe banonin në qytetet e sipërpërmendura. Pas përfundimit të periudhës së tyre të “punës”, ata ktheheshin në Shqipëri dhe zëvendësoheshin nga të rinj të tjerë.

Grupi drejtohej nga një çift bashkëshortësh shqiptarë, të cilët ishin banues të rregullt në Itali, me banim në Castagnito. Hetimet zbuluan detaje mbi mënyrën e rekrutimit të të rinjve dhe operimin e tyre, duke përfshirë gjetjen e disa makinave për transportimin e drogës dhe identifikimin e një baze ku fshihej droga.

Gjatë një ndërhyrjeje, u sekuestruan 344 gram kokainë e futur në kavanoza, dhe pas një periudhe vëzhgimi, u gjetën edhe 683 gram kokainë të tjera, duke arritur një total prej 1 kg droge. Pas këtyre gjetjeve, Prokuroria e Astit urdhëroi arrestimin e 41-vjeçarit, kreu i grupit. Përveç tij, u lëshuan masa sigurie për dy të rinj të tjerë 22-vjeçarë, bashkëshorten e kreut të grupit dhe kushëririn e saj.

Një tjetër 19-vjeçar shqiptar u arrestua më vonë gjatë aksionit, ndërsa një 25-vjeçar, i lidhur me këtë grup, u raportua për posedim të 22 gramëve marijuanë. Gjatë hetimeve, u gjet edhe një sasi e vogël kokainë dhe valuta cash, të cilat besohet se vinin nga aktiviteti i paligjshëm i grupit. Po ashtu, një 21-vjeçar shqiptar u arrestua në prill, ku iu gjetën 148 doza kokainë dhe 11 mijë euro cash, të dyshuar si të ardhura nga trafiku i drogës.