Një incident ka ndodhur sot pasdite pranë Spitalit “Memorial” në Fier, ku një automjet është përfshirë nga flakët gjatë lëvizjes. Sipas informacioneve paraprake, drejtuesi i mjetit arriti të vërejë zjarrin ndërsa automjeti ishte ende në ecje. Ai ndaloi menjëherë mjetin dhe doli prej tij pa dëmtime, duke shmangur kështu një tragjedi të mundshme.

Në vendngjarje kanë mbërritur shpejt një mjet zjarrfikës dhe një ambulancë, ndërsa policia dhe grupi hetimor po punojnë për të përcaktuar shkaqet e këtij zjarri. Pavarësisht përpjekjeve të menjëhershme të shërbimit zjarrfikës, automjeti është dëmtuar rëndë, me pjesën e përparme të tij që është shkrumbuar plotësisht.

Hetimet janë në vazhdim për të identifikuar arsyet që çuan në këtë incident, ndërsa qytetarët këshillohen të tregojnë kujdes për të shmangur situata të ngjashme.