Moderatorja e njohur Arbana Osmani ka zbuluar surprizën më të re për fansat e saj, të cilët mezi presin ta shohin sërish në ekran. Ajo ka njoftuar se së shpejti do të nisë programin e saj më të ri të titulluar “Mirëmbrëma yje”, që do të transmetohet në kanalin zyrtar të Arbanës në ‘YouTube’.

Emisioni, i cili xhirohet në Bogë të Malësisë së Madhe, në shtëpinë e vetë moderatores, premton një format të ngrohtë dhe argëtues. Arbana do të mirëpresë disa nga personazhet më të njohur të artit, showbizit, sportit dhe biznesit. Gjatë programit, të ftuarit do të kenë mundësinë të gatuajnë bashkë me moderatoren, të ndajnë rrëfimet e tyre, të luajnë, të diskutojnë mbi tema të ndryshme, si dhe të këndojnë apo kërcejnë.

Me këtë projekt të ri, Arbana Osmani synon të sjellë një atmosferë intime dhe të përzemërt për shikuesit, duke e bërë çdo episod një përvojë unike dhe të paharrueshme.