Kamarieri argjentinas, Braian Nahuel Paiz, ka thyer heshtjen një muaj pas vdekjes tragjike të yllit të muzikës Liam Payne. Paiz është një nga tre personat e arrestuar në Buenos Aires, të akuzuar për lidhje me rastin që tronditi gjithë botën. Në një intervistë për një gazetë argjentinase, ai ka treguar detaje të reja për takimin e tij me këngëtarin dhe për ngjarjet që mund të kenë çuar në tragjedi.

Sipas Paiz, kontakti i parë me Liam Payne ndodhi në restorantin ku këngëtari darkoi me të dashurën e tij, Kate Cassidy. Kamarieri shprehet se kishte dëgjuar thashethemet për përdorimin e drogës nga Payne dhe e gjeti atë nën efektin e drogës gjatë takimit.

“Kur e takova unë, ai ishte nën efektin e drogës. Nuk hëngri asgjë. Më foli për projektin e tij të ardhshëm në muzikë,” ka thënë Paiz, duke shtuar se kishin konsumuar drogë së bashku, por nuk kishin bërë asnjë lloj transaksioni të parave për këtë.

“Unë mora marijuanë, ai kokainë,” tha Paiz, duke hedhur poshtë çdo akuzë për përfitim material nga ai takim. Po ashtu, ai zbuloi se këngëtari i kishte shkruar nëpërmjet një llogarie anonime në Instagram. Ekspertiza mjekësore ka konfirmuar se Liam Payne kishte konsumuar alkool dhe kokainë para vdekjes së tij, dhe çdo dyshim për vetëvrasje është hedhur poshtë.

Ky rast ka shkaktuar trishtim të madh dhe ka nxjerrë në pah përdorimin e substancave të rrezikshme nga një nga yjet më të njohura të muzikës.