Ministrja e Shëndetësisë iu përgjigj pyetjeve të deputetit Agron Shehaj në interpelancën e mbajtur lidhur me skandalin e denoncuar në spitalin e Onkologjikut. Gjatë diskutimit, ministrja Koçiu theksoi se kontrollet në spitale janë intensifikuar dhe janë marrë masa administrative për parandalimin e shkeljeve.

“Ministria e Shëndetësisë është plotësisht e angazhuar për të mbështetur organet e drejtësisë në zbardhjen e së vërtetës. Ajo që kanë publikuar mediat janë indikacione dhe jo prova konkrete, të cilat meritojnë vlerësim të kujdesshëm,” tha Koçiu.

Ministrja shtoi se Ministria e Shëndetësisë ka intensifikuar inspektimet dhe kontrollet mbi subjektet farmaceutike për të garantuar respektimin e ligjeve. “Nga janari deri në muajin nëntor të këtij viti, janë kryer 500 inspektime, të cilat kanë rezultuar në marrjen e masave administrative për shkeljet e konstatuara,” deklaroi ministrja.

Ajo theksoi se tregtimi i barnave spitalore në rrjete të hapura përfaqëson një shkelje serioze të ligjit dhe përballës me sanksione ligjore. “Çdo subjekt që kryen këtë veprimtari do të mbajë përgjegjësi ligjore. Nuk do të shmangemi nga përgjegjësia për stafet administrative, të cilat janë të ngarkuara me kryerjen e kontrolleve periodike në farmaci dhe spitale,” u shpreh Koçiu.

Ministrja përsëriti se çdo individ që shkel ligjin do të trajtohet me të njëjtën përgjegjësi pavarësisht pozitës. “Ne kemi treguar në praktikë që respektojmë ligjin për këdo. Për ne, është e domosdoshme të referojmë çdo rast dhe të marrim masat e nevojshme, si dhe të mbështesim pa hezitim veprimtarinë e organeve hetimore,” përfundoi Koçiu.