Kreu i Partisë Demokratike, Sali Berisha, e ka quajtur procesin gjyqësor ndaj tij si “më të turpshmin në historinë e Shqipërisë”. Në një deklaratë për mediat, ai theksoi se ky gjyq është një veprim politik, pjesë e asaj që ai e quan “grusht shteti i mafies shqiptaro-amerikane” dhe një përpjekje për të shkatërruar opozitën.

“Është një proces politik i ndërmarrë në kuadrin e grushtit të shtetit të mafies shqiptaro-amerikane të George Soros kundër opozitës shqiptare. Ky është një proces që nxori në pah të gjithë shëmtinë e atyre që organizuan pucin kundër demokracisë për t’i dhënë pushtet absolut Edi Ramës,” tha Berisha. Ai e cilësoi procesin si pjesë e një serie ndjekjesh të ngjashme politike që përfshijnë emra të njohur si Salianji, Beleri, Meta, Malltezi, dhe Mediu, duke i përshkruar si akte të një “narkodiktatori”.

Berisha premtoi se do të vazhdojë betejën e tij “i palëkundur” dhe siguroi qytetarët se kauza e opozitës do të triumfojë mbi atë që ai e quajti një “diktaturë” pa të ardhme.

Protesta e Opozitës për Amendamentin mbi Minimumin Jetik

Ndërkohë, ish-kryeministri zbuloi detaje të rëndësishme mbi protestën e ardhshme të opozitës. Sipas Berishës, synimi kryesor i protestës është miratimi i një amendamenti që garanton minimumin jetik prej 200 euro për çdo shqiptar që jeton në kushte të vështira financiare.

“Qëllimi ynë është të miratohet amendamenti që vendos minimumin jetik 200 euro për çdo shqiptar që merr më pak se kaq ose asgjë. Ky është një hap i rëndësishëm për të zbutur varfërinë që përfshin veçanërisht pensionistët,” deklaroi ai.

Berisha premtoi se opozita do të organizojë mobilizime si brenda ashtu edhe jashtë parlamentit për të mbështetur këtë amendament dhe për të dëgjuar zërat e qytetarëve në nevojë.