Policia e Vlorës ka vënë në pranga tre persona të dyshuar për disa raste vjedhjesh në qytet. Sipas burimeve zyrtare, dy prej të arrestuarve kishin bashkëpunuar për të vjedhur rreth 1500 kg ullinj në pronën e një qytetari, ndërsa i arrestuari i tretë akuzohet për vjedhje me dhunë të një telefoni celular dhe për një tentativë vjedhjeje.

Pas hetimeve të thelluara dhe provave të siguruara, shërbimet e Komisariatit të Policisë së Vlorës bënë të mundur kapjen dhe arrestimin e këtyre personave:

– Një 34-vjeçar, banues në Vlorë, i akuzuar për veprën penale “Vjedhja me dhunë”. Ky individ dyshohet se më 13 nëntor 2024, i ka vjedhur një shtetaseje telefonin celular me dhunë dhe se më 23 tetor 2024, në lagjen “Hajro Çakërri”, ka tentuar të vjedhë me dhunë çantën e krahut të një vajze të mitur.

– Një 46-vjeçar dhe një 35-vjeçar, të dy banues në Vlorë, të akuzuar për veprën penale “Vjedhja”. Këta individë dyshohet se në bashkëpunim me njëri-tjetrin, më 8 nëntor 2024, kanë kryer vjedhjen e rreth 1500 kg ullinjsh nga banesa e një shtetasi.

Të tre të arrestuarit rezultojnë me precedentë penalë në fushën e vjedhjeve.

Materialet procedurale për këta raste i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.