Kryetarja e Komisionit Hetimor për koncesionet në shëndetësi, deputetja e Partisë Demokratike, Albana Vokshi, deklaroi sot se opozita është penguar në kryerjen e detyrës së saj në këtë komision. Vokshi akuzoi mazhorancën se që në momentin e miratimit të ngritjes së komisionit, kishte skenar të qartë për të penguar hetimin parlamentar.
Deputetja demokrate theksoi se nga dëshmitë e kryera janë mbledhur shumë fakte dhe prova që do të përdoren për kallëzim në SPAK ndaj personave të përfshirë në koncesionet e ‘Sterilizimit’ dhe ‘Check-Up’.
“Ne si opozitë kemi 10 vite që denoncojmë çdo ditë koncesionet në shëndetësi dhe kemi dëshmuar para organeve si persona në dijeni të këtyre aferave, duke ndihmuar në zbardhjen e tyre. Kemi zhvilluar betejat tona në Parlament dhe me protesta për të ngritur komisionet hetimore që refuzoheshin nga mazhoranca. Kemi kërkuar ngritjen e 8 komisioneve hetimore, por ato refuzoheshin me urdhër të Ramës. Pas betejës tonë, arritëm të ngrinim komisionet për TIMS dhe koncesionet në shëndetësi. Ne do të kërkojmë hetimin edhe të dy koncesioneve të tjera. Rama ka qenë dëshmitari i parë i kërkuar nga opozita; nuk bëmë kompromis, por mazhoranca tregoi që nuk kishte vullnet për hetim parlamentar,” deklaroi Vokshi.
“Dhjetë mbledhje janë bojkotuara nga mazhoranca, pasi kishin marrë porosë për të penguar hetimin parlamentar. Kanë tentuar të rrëmbejnë drejtimin e komisionit hetimor, ku 80% e deputetëve të opozitës u pezulluan për 40 ditë. Qëllimi ishte të minohej puna e komisionit parlamentar. Janë lejuar të dëshmojnë persona që nuk ishin fare në listën e dëshmitarëve. Mazhoranca u bë mburojë e këtij korrupsioni. Deputetët e opozitës e kanë kryer detyrën e tyre, duke dëgjuar dhjetëra dëshmitarë dhe mbledhur prova e fakte kundër shkeljeve të përsëritura ligjore. Do të bëjmë kallëzime shtesë. Është krijuar një rrjet i tërë kompanish të lidhura me familjarët e tyre, të cilët kanë gllabëruar paratë publike, duke vepruar si një grup i strukturuar kriminal,” tha Vokshi.
Ajo akuzoi gjithashtu nënkryetarin e komisionit, Plarent Ndreca, dhe deputeten e PS, Milva Ekonomi, për konflikt interesi për shkak të lidhjeve me koncesionin e Sterilizimit.
