Shqipëria do të përballet nesër me Çekinë në një sfidë të rëndësishme për Grupin B1 të Ligës së Kombeve, e cila do të luhet në stadiumin “Arena Kombëtare” në orën 20:45. Para ndeshjes, trajneri i Kombëtares shqiptare, Silvinjo, ka mbajtur një konferencë për shtyp ku ka theksuar rëndësinë e këtij takimi për fatet e grupit.

Silvinjo vlerësoi përvojën dhe angazhimin e lojtarëve të tij, duke përmendur Ajetin për paraqitjet e tij të shkëlqyera në dy Europianët e kaluar, duke theksuar gjithashtu që çdo ndeshje është e rëndësishme, sidomos kjo ndaj Çekisë, e cila është një nga rivalët më të fortë në grup. “Për ne, kjo ndeshje është shumë e rëndësishme. Ata kanë një pikë më shumë, por ne kemi avantazhin e tifozëve tanë, dhe nëse luajmë me zemër dhe shpirt, mund të arrijmë rezultat të mirë,” u shpreh trajneri.

Në lidhje me strategjinë, ai vuri theksin në forcën fizike të Çekisë, duke përmendur trajnerin inteligjent dhe lojtarët e fortë si Shulc, Çeri dhe Provod. Silvinjo tha se skuadra duhet të fokusohet në lojën e saj dhe të shfrytëzojë cilësinë teknike dhe organizimin taktik për të pasur sukses.