Kryetarja e Gjykatës së Elbasanit, Enkleda Kapedani është një emër i njohur, pasi më shumë se një vit më parë, ajo ka liruar nga burgu të dënuarin për dy vrasje, ish-anëtari i Bandës së “Gaxhait”, Viktor Ymeri.

Sot Kapedani është kryetare e Gjykatës së Elbasanit dhe do të hetohet për disa video që ajo ka bërë nga brenda ambienteve të Gjykatës dhe i ka hedhur në ‘Tik-Tok’.

Dy vite më parë teksa Ymerit i kishin mbetur edhe pak muaj nga kryerja e dënimit prej 25 vitesh burg nën akuzën e vrasjes, gjyqtarja vendosi që ai të lirohet menjëherë nga qelitë, duke i marrë parasysh edhe ditët e punës së kryera brenda burgut të Peqinit.

Ymeri ishte pjesë e bandës së Gaxhait, rivalen e asaj të Zani Caushit. Ymeri njihej ndryshe dhe si ‘Tori i Xhihanes’.

Ymeri u arrestua më 29 qershor të vitit 1999 për vrasjen e Arben Pajës dhe Ilir Xhungës. Në vitin 2000, ai u dënua nga Gjykata e Durrësit me burgim të përjetshëm, por vendimi u rrëzua nga Gjykata e Lartë.

Pas rreth 15 vitesh, Viktor Ymeri iu drejtua sërish Gjykatës së Lartë për të rishikuar vendimin, ndërsa kjo e fundi e ktheu sërish në Gjykatën e Apelit të Durrësit, e cila më 14 nëntor 2018, e dënoi përfundimisht me 25 vite burg. Viktor Ymeri ishte dënuar edhe në Itali për tentativë vrasje në vitin 1996, vepër penale e përfshirë në të njëjtin dënim.