Nga të gjitha vaktet e ditës, mëngjesi mbetet më i rëndësishmi. Siç thonë ekspertët, “mëngjesin duhet ta hamë si mbretër”, duke marrë ushqyesit që i japin trupit energjinë e nevojshme për gjithë ditën.

Megjithatë, në stilin e shpejtë të jetesës moderne, shumë njerëz e anashkalojnë mëngjesin dhe mjaftohen me një banane. Edhe pse ky frut është i pasur me vlera ushqyese, ekspertët kanë disa paralajmërime për mënyrën se si konsumohet.

Pse banania është e mirë për trupin
Banania është një frut që i vjen në ndihmë zemrës, tretjes dhe sistemit nervor. Ajo ndihmon në:
• Rregullimin e tensionit të gjakut,
• Luftimin e depresionit dhe lodhjes,
• Përmirësimin e tretjes dhe lehtësimin e konstipacionit,
• Rritjen e prodhimit të hemoglobinës, falë përmbajtjes së hekurit.

Gjithashtu, banania është e pasur me kalium, magnez, fibër dhe vitaminë B6, elemente që e bëjnë atë një burim të shkëlqyer energjie.

Por a duhet ngrënë me stomak bosh?
Këtu ekspertët ndahen në dy qëndrime. Disa mendojnë se banania mund të konsumohet çdo mëngjes për energji të shpejtë, ndërsa të tjerë paralajmërojnë se ngrënia e saj me stomak bosh mund të shkaktojë:
• Rritje të menjëhershme të sheqerit në gjak, e ndjekur nga rënie e energjisë;
• Ndjenjë plogështie ose përgjumjeje;
• Probleme me aciditetin dhe zorrët;
• Çrregullim të balancës mes kalciumit dhe magnezit në gjak.

Si ta konsumoni në mënyrë të shëndetshme
Ekspertët britanikë sugjerojnë që banania të konsumohet pas mëngjesit, ose në kombinim me ushqime të tjera për ta balancuar më mirë.

Disa mënyra të shëndetshme për ta përfshirë në mëngjes janë:
• Tërshërë me qumësht dhe banane;
• Kos me banane, fruta pylli dhe drithëra;
• Smoothie me banane, mjaltë dhe pak kanellë.

Në këtë mënyrë, përfitoni vlerat e saj ushqyese pa shqetësuar stomakun dhe pa ndier lodhje gjatë ditës.