Bashkëdrejtuesi i koalicionit “Nisma-Shqipëria bëhet”, Adriatik Lapaj, ka reaguar ndaj deklaratës së kryeministrit Edi Rama lidhur me kandidimin e babait të tij në listën e mbyllur të Beratit. Pas fjalëve të Rama-s, i cili komentoi vendosjen e prindërve të kandidatëve në listat e koalicionit të Lapajt, ky i fundit ka shpërndarë një video në rrjetet sociale për të sqaruar qëndrimin e tij.

Lapaj e ka cilësuar Ramën si pjesë të një grupi udhëheqësish që përpiqen të trashëgojnë pushtetin, duke shtuar se ndryshe nga koalicioni i tij, që ka vendosur të djegë emrat e kandidatëve të listës së mbyllur, Rama do t’i fusë ata në Parlament. Ai theksoi se partia e Ramës ka një praktikë të trashëgimisë së pushtetit nga prindërit te fëmijët dhe këtë mentalitet po ndjek edhe në zgjedhjet e ardhshme.

“Zoti Rama, ortaku i Zotit Berisha, që të dy bashkë i mbyllën listat qenka shqetësuar shumë përse ne kemi vendosur prindërit në listat e mbyllura, për t’i djegur ato, e me qëllim që ne të garojmë realisht për të shkuar në Parlament. Rama është mësuar me partinë e vetë, që ta trashëgojë pushtetin nga babai te fëmijët dhe nga nëna te fëmijët. Këtë po bëjnë edhe në këto zgjedhje”, thotë Lapaj.

Më tej ai u bën thirrje qytetarëve që t’i hedhin një sy listave të mbyllura të PS në çdo qark dhe do të gjejnë aty bijtë e ish-ligjvënësve dhe zyrtarëve të majtë.

“Ju ftoj të futeni në listat e mbyllura që ka bërë Rama dhe të verifikoni fëmijët e kujt janë ata që janë në listat e mbyllura. Shikoni se ndoshta do të gjeni aty fëmijët e ish-deputetëve apo zyrtarëve të lartë të PS. Sigurisht që ata pushtetin e trashëgojnë se ashtu e kanë stil. Ne duam ta shpartallojmë sistemin e tyre që të rinjtë në këtë vend të kenë mundësi të kenë garë, pavarësisht fëmijët e kujt janë”, shprehet Lapaj më tej.

Kujtojmë se kryeministri Rama teksa i referohej Adriatik Lapajt, pak ditë më parë në një takim tha: “Parti të re me gjithë kushërinjtë dhe me babanë në krye të listës, mund të bëjë çdokush, por edhe të bërtasë: jemi rinia! Edhe të shajë mbarë e mbrap, njësoj si pleqëria.”