Në përfundim të dëshmisë së dhënë në SPAK që ka zgjatur rreth 2 orë e gjysmë, deputetja e Partisë Demokratike Jorida Tabaku ka deklaruar se në aferën e Inceneratorëve janë mbi 60 persona të përfshirë.

Ajo theksoi se grupi kriminal që është denoncuar për shpërdorim detyre dhe korrupsion masiv përbëhet nga ministra dhe kryebashkiakë duke përmendur edhe emrat e tyre ndërsa shtoi se përgjegjës kryesor është kryeministri Edi Rama dhe qeveria shqiptare.

“Grupi i strukturuar kriminal ka kryer veprën e shpërdorimit të detyrës dhe korrupsion pasiv. Ne kemi akuzuar ministrat Gjiknuri, Ahmetaj, Agaçin, Veliajn. Subashin, Sakon, Alqi Bllakon dhe një sërë zyrtarësh të dytë apo të tretë. Kryeministri është personi që duhet të kishte dijeni për veprimet e këtij grupi.

Përgjegjësi kryesor është qeveria shqiptare. Është e qartë për gjithë publikun përgjegjësia e të gjithëve. Ne kemi dorëzuar dokumentet dhe provat. E inkurajoj SPAK të lëvizë aty ku ka pushtet. Do kisha dashur të ecë më shpejt. Dua të vazhdojë punën që për mua është prioritare për ta denoncuar”, deklaroi Tabaku.