Një tjetër dëshmi tronditëse është shtuar në çështjen gjyqësore ndaj Sean “Diddy” Combs, ndërsa mikeshë e ngushtë e Cassie Ventura-s, Bryana Bongolan, u ngjit në tribunën e dëshmitarëve për të rrëfyer një episod të dhunshëm që, sipas saj, i ka lënë pasoja të rënda psikologjike.

Bongolan, e cila citoi të drejtën e saj për të mos vetë-inkriminuar veten sipas Amendamentit të Pestë të Kushtetutës Amerikane, dëshmoi për një incident të vitit 2016, kur sipas saj, Diddy e kapi dhe e vari nga ballkoni i katit të 17-të të një ndërtese, përpara se ta përplaste drejt mobilieve. “Po përpiqesha të mos rrëshqisja. Ai bërtiste ‘Ti e di ç’ke bërë’, duke shqiptuar çdo rrokje,” tha ajo në sallën e gjyqit.

Ngjarja është përmendur edhe më parë nga Cassie Ventura në padinë e saj të vitit 2023 ndaj Diddy-t, e cila u mbyll me një marrëveshje pak ditë më vonë. Por dëshmia e Bongolan, e përforcuar me fotografi që tregojnë qafore, fasha dhe një plagë në mes, si dhe një të nxirë në fytyrë, ka risjellë në vëmendje brutalitetin e supozuar të artistit të njohur.

Dëshmitarja tregoi se ndodhej në apartamentin e Cassie-t kur Diddy trokiti në derë. Në përpjekje për të mbrojtur të dashurën e saj të asaj kohe, Bongolan e fshehu atë në tualet dhe doli vetë në ballkon. Pikërisht aty, ndodhi episodi i dhunës, që sipas saj ka lënë gjurmë të thella në gjendjen e saj psikologjike, duke përfshirë makthe dhe episode të ulërimave në gjumë.

E pyetur për marrëdhënien e saj me Cassie-n, Bongolan e cilësoi këngëtaren si “një nga mikeshat më të afërta” dhe rrëfeu se periudha kur ishin bashkë shënohej nga përdorimi i shpeshtë i substancave narkotike: “Konsumonim shumë marijuanë, kokainë, ketaminë… u kthye në zakon,” tha ajo.

Ndërkohë, prokurorët kanë bërë të ditur se nuk do të ngrejnë akuza ndaj Bongolan për sa kohë dëshmia e saj mbetet e vërtetë dhe në përputhje me faktet.

Procesi gjyqësor ndaj Sean Combs vijon të thellohet me çdo seancë, duke zbuluar një botë të errët prapa jetës publike të një prej figurave më të fuqishme të muzikës amerikane.