Ajola Xoxa, bashkëshortja e kryebashkiakut të Tiranës, Erion Veliaj, është paraqitur ditën e sotme në ambientet e Prokurorisë së Posaçme Kundër Krimit të Organizuar dhe Korrupsionit (SPAK), në kuadër të zbatimit të masës së sigurimit personal “detyrim paraqitje”.

Xoxa ndodhet nën hetim për një sërë veprash penale të rënda, ndër të cilat “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim, në 9 episode të ndryshme. Po ashtu, ajo akuzohet për “Pastrimin e produkteve të veprës penale ose veprimtarisë kriminale” si dhe për “Mosdeklarim, fshehje ose deklarim të rremë të pasurive dhe interesave privatë”.

Hetimet ndaj saj janë pjesë e një dosjeje voluminoze që lidhet me dyshime për abuzim me detyrën, përfitime të paligjshme dhe fshehje të të ardhurave përmes aktiviteteve të dyshuara fiktive apo në bashkëpunim me persona të tjerë me pushtet dhe ndikim publik.

SPAK vijon hetimet në thellësi ndërkohë që kjo paraqitje shënon një tjetër moment të rëndësishëm në rrethimin ligjor që po zgjerohet rreth figurave të larta të pushtetit vendor. Ashtu si në raste të ngjashme të mëparshme, Prokuroria e Posaçme nuk ka dhënë ende detaje shtesë për ecurinë e çështjes, por burime pranë organit të akuzës bëjnë me dije se priten zhvillime të tjera gjatë ditëve në vijim.