Një aksident tragjik ka ndodhur mbrëmjen e 17 janarit në kantierin e ndërtimit të Aeroportit të Vlorës, ku një punëtor ka humbur jetën pas një përplasjeje me një fadromë.

Viktima është Nusret Xhoka, 60 vjeç, nga Dibra, i cili u përplas nga fadroma e drejtuar nga Rrahman Sllamniku, 63 vjeç, banues në Prishtinë, Kosovë. Të dy punonin për kompaninë ndërtuese “2A Group”.

Sipas burimeve, Xhoka sapo kishte zbritur nga trajleri kur u godit fatalisht nga fadroma, duke humbur jetën në vend.

Policia e Vlorës ka arrestuar Rrahman Sllamnikun, pasi dyshohet se ai humbi kontrollin mbi fadromën dhe përplasi trajlerin, duke shkaktuar vdekjen e kolegut të tij.

Në njoftimin zyrtar, Policia e Vlorës deklaroi:
“Specialistët për Hetimin e Krimeve arrestuan shtetasin Rr. S., 63 vjeç, pasi më datë 17.01.2025, rreth orës 21:20, në kantierin e Aeroportit të Vlorës, duke drejtuar një fadromë, ka humbur kontrollin mbi drejtimin e saj dhe ka përplasur një trajler. Si pasojë, drejtuesi i trajlerit, shtetasi N. Xh., 60 vjeç, ka humbur jetën.”

Autoritetet po vijojnë hetimet për të zbardhur rrethanat e sakta të kësaj tragjedie, që ka tronditur kantierin më të madh të ndërtimit në vend.