Mesnatën e së martës, një aksident i rëndë ndodhi në fshatin Pluk, Lushnje, kur dy automjete përfunduan brenda një lokali, duke shkaktuar dëme të mëdha materiale dhe plagosjen e një personi. Automjeti tip “Volksvagen” me targa AA 568xi, pasi humbi kontrollin, goditi një automjet tip “Benz” të parkuar përpara lokalit. Si pasojë e përplasjes, të dy mjetet përfunduan brenda ambienteve të lokalit, duke e shkatërruar plotësisht.

Drejtuesi i “Volksvagen”-it u dërgua me urgjencë në spitalin e Lushnjes për të marrë ndihmën mjekësore. Për fat të mirë, në momentin e aksidentit, lokali ishte i mbyllur dhe nuk kishte klientë apo personel brenda tij, duke shmangur kështu dëme më të mëdha në njerëz. Pronarja e lokalit, e tronditur nga ngjarja, deklaroi se kishte qenë në shtëpi kur dëgjoi zhurmën dhe më pas pa pamjet nga kamerat e sigurisë.

“Dëgjuam një zhurmë të tmerrshme ndërsa ishim në shtëpi dhe pamë nga kamerat çfarë kishte ndodhur. Këtu është shkatërruar gjithçka”, tha ajo.

Ende nuk dihet nëse drejtuesi i mjetit ishte nën efektin e alkoolit apo substancave narkotike, por autoritetet po hetojnë dhe kanë theksuar se shpejtësia e automjetit ka qenë e lartë. Hetimet janë në vazhdim për të zbardhur të gjitha rrethanat e aksidentit.