Një aksident i rëndë është shënuar në qytetin e Manchester-it, ku një autobus me dy kate është përplasur me një urë të ulët, duke shkaktuar shkëputjen e plotë të çatisë së mjetit dhe lëndimin e 15 personave.
Ngjarja ka ndodhur në zonën Eccles, përgjatë itinerarit të linjës 100, e cila lidh Shudehill-in me Trafford Centre dhe Warrington. Autobusi, që në momentin e aksidentit kishte pasagjerë në të dy katet, u përplas me forcë me urën, duke bërë që pjesa e sipërme e tij të shqyhet dhe të përfundojë në tokë.
Tre nga të plagosurit ndodhen në gjendje të rëndë, ndërsa 12 të tjerët kanë pësuar lëndime më të lehta, por janë dërguar për trajtim në spital. Shërbimet emergjente, përfshirë ambulanca, zjarrfikës dhe forca policie, mbërritën menjëherë në vendngjarje.
Dëshmitarët kanë përshkruar skena paniku në vendin e ngjarjes.
“Mund të dëgjoja vetëm ulërima që vinin nga kati i sipërm i autobusit”, ka deklaruar një dëshmitar për Manchester Evening News, duke shtuar se pamjet ishin tronditëse.
Një tjetër dëshmitar tregoi për një grua që i sinjalizonte paramedikëve me dëshpërim, ndërsa pranë saj ndodhej një person i shtrirë në tokë.
“Kur pashë çatinë e autobusit të rrëzuar në tokë, kuptova se ishte diçka shumë serioze. Autobusi dukej i mbushur me pasagjerë, pasi ndodhte në orar piku.”
Pamje të publikuara nga vendngjarja tregojnë dëmet e mëdha që ka pësuar autobusi – sediljet në pjesën e përparme të katit të dytë kanë mbetur të paprekura, ndërsa ato në pjesën e pasme janë shkatërruar thuajse plotësisht.
Policia ka nisur hetimet për të përcaktuar shkaqet e aksidentit. Një nga pistat që po hetohet është ajo e gabimit të shoferit, i cili mund të mos ketë ndjekur rrugën e duhur për autobusë me dy kate.
Autoritetet lokale kanë bërë thirrje që qytetarët të shmangin zonën për shkak të ndërhyrjeve të ekipeve të shpëtimit dhe pastrimit.
Ndërkohë, kompania e transportit publik që menaxhon linjën 100 ka deklaruar se po bashkëpunon me hetimet dhe ka shprehur keqardhje për ngjarjen, duke u uruar shërim të shpejtë të gjithë të lënduarve.
