Një aksident rrugor ka ndodhur pasditen e sotme në autostradën Levan–Tepelenë, në afërsi të fshatit Kafaraj, ku janë përfshirë një automjet tip “Benz”, me të cilin udhëtonin tre turistë francezë, dhe një mikrobus i linjës Libohovë.
Turistët po udhëtonin drejt destinacionit turistik të Ksamilit, kur për arsye ende të paqarta, automjeti “Benz” është përplasur me mikrobusin. Në vendngjarje kanë mbërritur menjëherë shërbimet e policisë dhe ekipet mjekësore, të cilat po asistojnë të lënduarit dhe po punojnë për menaxhimin e trafikut dhe zbardhjen e plotë të shkaqeve të aksidentit.
Lëvizja në këtë segment rrugor po zhvillohet me vështirësi, ndërkohë që autoritetet apelojnë për kujdes maksimal nga drejtuesit e mjeteve.
