Elbasan – Kryetari i Partisë Demokratike, Sali Berisha, urimet për Ditën e Verës i shfrytëzoi për të kritikuar qeverinë, duke theksuar se kryeministri Edi Rama dhe ministrja e Infrastrukturës, Belinda Balluku, nuk kanë më të ardhme politike.
Gjatë vizitës në panairin e qytetit, Berisha u shpreh: “Sot këtë festë shqiptarët e festojnë më të bindur se kurrë se festën tjetër të keqen ia lanë dimrit dhe Rama me lubinë të ardhme nuk kanë më. Kjo është dita e fundit e verës që ata i gjen me karrige të thyer ashtu siç janë. Nuk e meritojnë!”
Ai theksoi gjithashtu shqetësimin për integrimin europian të Shqipërisë: “Është e trishtë dhe e dhimbshme se në 34 vite kjo është Dita e parë e Verës në të cilën dyert e Europës u mbyllën për shqiptarët për shkak të veprimeve të pashembullta në historinë e vendeve që shkojnë drejt integrimit nga dyshja Rama-Balluku. Ndaj dhe le të urojmë dhe të punojmë që Dita tjetër e Verës të na gjejë sa më afër ëndrrës tonë europiane.”
Berisha e lidhi mesazhin me rëndësinë e festës, duke e cilësuar Ditën e Verës si simbol të ripërtëritjes dhe shpresës për të ardhmen e vendit.
