KAVAJË – Një aksident në det u regjistrua pasditen e sotme në zonën e Golemit, rreth 800 metra larg perimetrit të sigurisë në vendin e quajtur “Manhatan”, ku dy mjete lundruese të tipit Jet Ski u përplasën mes tyre.

Sipas të dhënave zyrtare të policisë, në përplasje u përfshinë shtetasi P. B., 31 vjeç, lindur në Kosovë, dhe S. D., 25 vjeç, lindur në Çorovodë. Si pasojë, 31-vjeçari nga Kosova ka pësuar dëmtime dhe është transportuar me urgjencë në spital nga Policia Kufitare, që po monitoronte zonën detare në momentin e aksidentit. Fatmirësisht, ai ndodhet jashtë rrezikut për jetën.

Drejtuesi tjetër i motorit, S. D., është shoqëruar në Komisariatin e Policisë për veprime të mëtejshme procedurale.

Të dy personat ishin duke lundruar së bashku dhe ishin të pajisur me jelekë shpëtimi, ndërsa grupi hetimor ndodhet në vendngjarje për të sqaruar shkaqet dhe rrethanat e aksidentit. Zona ku ndodhi përplasja është një hapësirë detare e përcaktuar për lundrim dhe jo për plazh.

Autoritetet pritet të japin më shumë detaje pas përfundimit të hetimeve paraprake.