Një aksident i rëndë rrugor ka ndodhur në fshatin Tregan, Elbasan, ku një 44-vjeçar i identifikuar me inicialet F.P., duke drejtuar automjetin në gjendje të dehur, ka përplasur një këmbësor dhe një mjet bujqësor të parkuar, përpara se të largohej nga vendi i ngjarjes.

Pas veprimeve hetimore të policisë, F.P. u arrestua, ndërsa në pranga ra edhe një 55-vjeçar, pasagjer në automjet, i cili nuk njoftoi autoritetet për aksidentin.

“Si rezultat i hetimeve të menjëhershme, specialistët e qarkullimit rrugor identifikuan dhe arrestuan drejtuesin e automjetit që shkaktoi aksidentin. Po ashtu, u arrestua edhe shtetasi A.B., 55 vjeç, për moskallëzim të krimit. Automjeti i përdorur nga 44-vjeçari u gjet dhe u sekuestrua nga policia,” thuhet në njoftimin zyrtar.

I lënduari, 56-vjeçari F.K., ndodhet aktualisht në Spitalin e Traumës, ku po merr kujdes mjekësor.

Materialet procedurale i janë referuar Prokurorisë së Elbasanit për veprime të mëtejshme.