KRETË – Një aksident i rëndë është shënuar mbrëmjen e djeshme në rrugën e vjetër kombëtare pranë zonës së Gouves, në Kretë, duke çuar në plagosjen e një personi.

Sipas raportimeve nga Cretapost, aksidenti ndodhi rreth orës 19:00, kur një autobus turistik u përplas fuqishëm me një automjet pasagjerësh, i cili përfundoi mbi barrierat mbrojtëse të rrugës.

Menjëherë pas përplasjes, në vendngjarje mbërriti një ambulancë e EKAB, e cila transportoi drejtuesin e makinës në Spitalin e Përgjithshëm Universitar të Heraklionit. Mësohet se ai ka pësuar lëndime, por ndodhet jashtë rrezikut për jetën.

Për shkak të derdhjes së një sasie të konsiderueshme nafte në rrugë, policia rrugore bllokoi përkohësisht segmentin ku ndodhi aksidenti, ndërsa shërbimi zjarrfikës ndërhyri për pastrimin dhe normalizimin e trafikut.

Autoritetet kanë nisur hetimet për të zbardhur shkaqet e aksidentit.