Tre tifozët e PAOK-ut, të plagosur në aksidentin fatal të ndodhur të martën në Rumani, ndodhen në gjendje të qëndrueshme shëndetësore dhe jashtë rrezikut për jetën. Lajmi konfirmohet nga drejtori i spitalit në Timishoara, ku ata po marrin trajtim mjekësor.

Në një prononcim për televizionin Mega, drejtori i spitalit, Dorel Sandescu, bëri të ditur se njëri prej të plagosurve është në gjendje më të rëndë dhe po trajtohet në repartin e kujdesit intensiv. Ai ka pësuar fraktura të shumta si dhe dëmtime në mushkëri.

Sipas Sandescut, pacienti në kujdes intensiv është i stabilizuar, nuk është i intubuar dhe po merr oksigjen përmes maskës, ndërsa gjendja e tij po monitorohet vazhdimisht nga stafi mjekësor.

Autoritetet rumune kanë konfirmuar identitetin e viktimës së dytë shqiptare në aksidentin fatal të martës, duke e bërë kështu dy numrin e shtetasve shqiptarë që humbën jetën në këtë ngjarje tragjike. Pas Vasil Pilos, viktima tjetër është Genci Sadiku, i cili udhëtonte së bashku me Pilos në të njëjtin furgon.

Sipas hetimeve paraprake, mjeti i tifozëve të PAOK-ut u përplas drejtpërdrejt me një kamion, pasi po lëvizte në korsinë e gabuar, duke rezultuar fatal për të gjithë pasagjerët. Pamjet nga vendngjarja tregojnë qartë momentin e përplasjes “kokë më kokë”, që shpjegon shkallën e lartë të tragjedisë.

Autoritetet rumune vazhdojnë hetimet për të përcaktuar rrethanat e plota të aksidentit, ndërsa lajmi ka tronditur jo vetëm komunitetin e tifozëve të PAOK, por edhe publikun në Shqipëri dhe Greqi.