Policia e Tiranës ka arrestuar Ekerem Skurenin, 41-vjeçarin që përplasi me automjetin e tij dy monopatina në të cilat ndodheshin tre të mitur, gjatë një aksidenti të ndodhur ditën e djeshme në bulevardin “Dëshmorët e Kombit”.

Skureni akuzohet për shkelje të rregullave të qarkullimit rrugor, ndërsa është vënë nën hetim për pasojat e shkaktuara në shëndetin e fëmijëve, njëri prej të cilëve mbetet në gjendje të rëndë.

Nga hetimet paraprake ka rezultuar se fëmijët kanë kaluar rrugën me semafor të kuq, ndërsa shoferi ka qenë në lëvizje me semafor portokalli, çka e ndërlikon më tej dinamikën e ngjarjes.

Autoritetet po thellojnë hetimet për të përcaktuar saktësisht përgjegjësinë ligjore të secilit palë, ndërsa grupi hetimor po analizon pamjet e kamerave të sigurisë në zonë.

Ngjarja ka ngritur shqetësime për sigurinë rrugore të fëmijëve dhe përdorimin e monopatinave elektrike në akse të frekuentuara, duke rikthyer në vëmendje nevojën për ndërgjegjësim dhe respektim të sinjalistikës rrugore nga të gjithë përdoruesit e rrugës.