Ministri i Punëve të Brendshme të Kosovës, Xhelal Sveçla, ka njoftuar sot se në bashkëpunim me Policinë e Kosovës, Prokurorinë dhe Agjencinë e Inteligjencës së Kosovës, është zhvilluar një operacion për mbylljen e strukturave paralele të Serbisë në territorin e Kosovës.

Ministri bëri të ditur se komuna ilegale e Pejës në Gorazhdec, komuna paralele e Istogut në Osojan dhe komuna paralele e Klinës në Videjë janë mbyllur në këtë aksion. Ai theksoi se ky veprim vjen në përkushtim të plotë ndaj fuqizimit të institucioneve të Republikës së Kosovës dhe respektimit të Kushtetutës dhe unitaritetit të saj.

Përmes një postimi në rrjetet sociale ministri i Punëve të Brendshme tha se me këtë rast, në Gorazhdec është mbyllur komuna ilegale e Pejës, në Osojan komuna paralele e Istogut dhe në Videjë komuna paralele e Klinës.

“Mbesim të përkushtuar në fuqizim institucioneve të Republikës së Kosovës, në respektim të plotë të Kushtetutës sonë dhe unitaritetit të saj. Koha e paligjshmërisë ka përfunduar dhe institucioni i vetëm i Serbisë brenda Republikës së Kosovës do të jetë ambasada e saj në Prishtinë”, ka shkruar Sveçla.