Autoriteti Kombëtar i Ushqimit (AKU) ka konstatuar shkelje të rënda në sigurinë ushqimore në kompaninë e përpunimit të mishit “KMY”, duke pezulluar aktivitetin e saj dhe duke sekuestruar sasi të konsiderueshme produktesh.

Gjatë një kontrolli të ushtruar në ambientet e subjektit, inspektorët gjetën rreth 738 kilogramë fileto dhe gjoks pule, të cilat nuk përmbushnin standardet higjieno-sanitare. Sipas verifikimeve, mishi ishte trajtuar në kushte të papërshtatshme, pasi gjatë proceseve të ngrirjes dhe shkrirjes ishte vendosur drejtpërdrejt në dysheme.

Gjithashtu, ambientet e ruajtjes paraqisnin probleme serioze, përfshirë praninë e mykut dhe ndryshkut, elementë që rrisin ndjeshëm rrezikun për shëndetin e konsumatorëve.

Në përfundim të inspektimit, AKU bëri të ditur se ka pezulluar aktivitetin e kompanisë deri në përmbushjen e plotë të kërkesave ligjore dhe standardeve të sigurisë ushqimore. Ndërkohë, e gjithë sasia e mishit të sekuestruar është asgjësuar për të shmangur çdo rrezik për konsum publik.