Shtetet arabe të Gjirit kanë bërë thirrje ndaj Shteteve të Bashkuara për të “neutralizuar” kërcënimin iranian, me qëllim që të mbrojnë tregun e naftës dhe ekonomitë që varen prej tij, sipas tre burimeve të Reuters.

Burime diplomatike, si dhe pesë diplomatë perëndimorë dhe arabë, thanë se Uashingtoni po ushtron presion ndaj vendeve të Gjirit që të bashkohen në një koordinim të ngushtë me SHBA dhe Izraelin.

“Ekziston një ndjenjë e gjerë në të gjithë Gjirin Persik se Irani ka kaluar çdo vijë të kuqe me çdo vend të Gjirit”, deklaroi Abdulaziz Sagher, president i Qendrës Kërkimore të Gjirit me seli në Arabinë Saudite.

Ai shtoi: “Në fillim i mbrojtëm dhe kundërshtuam luftën. Por sapo filluan të na godisnin, u bënë armiq. Nuk ka mënyrë tjetër për t’i klasifikuar”.

Sulmet e fundit kanë rritur frikën se një Iran me kapacitete të fuqishme sulmuese mund ta mbajë peng linjën energjetike të rajonit sa herë që tensioni rritet.

Ndërsa konfliktet ajrore amerikano-izraelite intensifikohen, burimet nënvizojnë se atmosfera mes udhëheqësve të Gjirit është e qartë: Irani duhet të dobësohet seriozisht, përndryshe rajoni do të jetojë nën kërcënim të vazhdueshëm.