Kryeministri Edi Rama, në një intervistë për gazetarin italian Giorgio Mottola nga emisioni investigativ “Report” në Rai3, është pyetur për akuza të rënda të hedhura ndaj tij nga ish-zv.kryeministri Arben Ahmetaj. Ahmetaj e akuzon Ramën se ka pritur në zyrë dhe është takuar me bosë të mafias. Rama e ka përshkruar këtë burim si të “ndotur dhe me probleme me drejtësinë”.

Gjatë intervistës, gazetari italian e pyeti Ramën për takimet e tij me biznesmenin Luftar Hysa, i cili sipas autoriteteve kanadeze është i lidhur me pastrimin e parave dhe kartelin e lojërave të fatit.

Edi Rama: Duhet të jetë ndonjë burim shumë i ndotur dhe me probleme me drejtësinë.
Rai3: Duke hyrë më konkretisht në gjërat për të cilat ka prova të dokumentuara: takimet tuaja me Luftar Hysën. Pse jeni takuar me Luftar Hysën këtu në vitin….
Edi Rama: Një tjetër emër që përmendet si pa të keq. Më fal, po nuk dua të humbas mundësinë për të dalë në transmetim te ju duke përmendur emra, që nuk di as çfarë duan të thonë apo kush janë.
Rai3: Sipas autoriteteve kanadeze është një prej pastruesve më të mëdhenj të parave dhe i kartelit të lojërave të fatit. Këtu në Shqipëri i është dhënë koncesion për një kazino, kështu që flasim për fakte dhe rrethana mjaft konkrete.
Edi Rama: Unë ju them këtë, që ju flisni për Engjëll Agaçin dhe këtu ishte kulmi i emisionit tuaj.