Presidenti i Partisë së Lirisë, Ilir Meta, me tone të ashpra ka akuzuar kreun e Prokurorisë së Posaçme Anti-Korrupsion (SPAK), Altin Dumani, se ai dhe prokurorët e tjerë janë takuar me Charls McGonigal.

Sipas Metës, ai është marrë në pyetje si person që është kundërshtar i narko-regjimit, ndërkohë që ka theksuar se SPAK po sulmon opozitën.

Madje ka shkuar më tej duke thënë se Prokuroria e Posaçme merret me “përrallat e laraskave”, ndërkohë që nuk ndalon aferat, si ato të Portit të Durrësit, Inceneratorëve dhe PPP-ve.

“Ju e dini që SPAK është kthyer falë Dum Dumanit në një parti bashkëqeverisëse e Edi Ramës. Unë jam pyetur 3 orë kot më kot. Unë jam pyetur në cilësinë e kundërshtarit të këtij narkoshtetit dhe narko-regjimi që e mban në këmbë Dum-Dumani.

I cili në vend që të hetojë McGonigalin, të cilin e ka takuar ai dhe prokurorët e tjerë, në vend të ndalojë Edi Ramën, Inceneratorin, aferën e Portit të Durrësit, në vend të ndalojë gjithë ato PPP që janë vjedhja më e madhe financiare, merret me përrallat e laraskave të tij. Po iki se kam sipërmarrjen dhe tryezën. Këto do Dum-Dumani, këto detyra i kanë caktuar.

Jam pyetur si kundërshtar i narko-regjimit, që kërkon të mbahet me Dum Dumanin tuaj. Dum Dumani që bën të ato akte kriminale kundër opozitës për të shpëtuar Edi Ramën,” thekson Meta.