Shpërthimi në derën e motrave Nikolli në Elbasan, që shkaktoi lëndimin e një 29-vjeçari dhe shkatërrimin e disa apartamenteve, mbetet një krim ende pa autor. Alda Nikolli, megjithatë, është e bindur se pas këtij krimi fshihet Nuredin Dumani. Ajo tregon se kishte krijuar një marrëdhënie prej dy muajsh me të penduarin e drejtësisë, marrëdhënie e cila u prish dhe pasoi me kërcënime.

“Nuredin Dumanin e kam njohur nëpërmjet kunatit tim Amarildo Xhanej, që ndodhet në burgun 313. Mendova që donte të njiheshim, por paska pasur qëllim të na përdorë si mua dhe motrën time Xhovanën. Unë nuk e dija që Nuredini kishte të dashur jashtë, Mirjetën, e cila më kërcënoi dhe më kërkoi të faktoja që flisja me Nuredinin. Kur ja faktova me një voice, 5 minuta më vonë Nuredini më mori në telefon dhe më kërcënoi. Më pas bllokoi adresat, më la të qetë dy ditë e pastaj veproi”, rrëfen Alda Nikolli.

Ajo gjithashtu thekson se Nuredin Dumani, pasi dështoi në përpjekjen për të dëmtuar statusin e të penduarit të drejtësisë të Amarildo Xhanej, nga të dhënat që merrte nga kunata e tij, vendosi të vepronte hapur në burg.

“Më ka kërcënuar me Amarildon, e ka rrahur dy herë në burg brenda një jave e gjysmë,” shprehet Alda Nikolli.