Futbolli saudit vazhdon të trazojë tregun e transferimeve, këtë herë me një tjetër goditje të bujshme nga Al-Hilal. Klubi nga Arabia Saudite ka bërë një ofertë prej 100 milionë eurosh për sulmuesin slloven të RB Leipzig, Benjamin Sesko, një nga talentet më të kërkuar të futbollit europian.

Al-Hilal ka përfituar nga ngërçi në negociatat mes Seskos dhe Arsenalit, skuadër që e kishte prioritet për repartin ofensiv, por që nuk ka arritur të gjejë gjuhën e përbashkët me përfaqësuesit e lojtarit. Në këtë vakuum ka ndërhyrë klubi saudit, i cili duket se nuk ka ndërmend të kursehet për të shtuar një tjetër emër të madh në skuadrën e yjeve.

Sesko, 22 vjeç, ka spikatur me paraqitjet e tij në Bundesligë me Leipzigun, ku ka treguar potencial të jashtëzakonshëm falë shpejtësisë, fuqisë fizike dhe instinktit të golit. Ai ka qenë në radarin e disa klubeve të mëdha, përfshirë edhe Manchester United, por oferta e Al-Hilal është aktualisht më e larta në tavolinë.

Ky është një tjetër sinjal i qartë se futbolli saudit po tenton me çdo kusht të bëhet një destinacion elitë për lojtarët europianë, duke përdorur fuqinë financiare për të tërhequr talentet më premtuese të botës.

Mbetet për t’u parë nëse Sesko do të pranojë kalimin në një kampionat jo aq konkurrues, apo do të zgjedhë të vazhdojë rritjen në arenën europiane.