Dhjetëra delfinë të ngordhur janë gjetur në breg të plazhit Mareek, në Puntland, një rajon në Bririn e Afrikës. Banorët dhe autoritetet raportojnë se numri i saktë i delfinëve të ngordhur mbetet i paqartë, por sipas Ministrisë së Mjedisit, incidenti mund të jetë shkaktuar nga rrjetat e paligjshme të peshkimit dhe ndotja e ujit.

“Ministria e Mjedisit dhe Ministria e Peshkimit po punojnë së bashku për të hetuar urgjentisht këtë incident të pazakontë,” – thuhet në një deklaratë zyrtare, ndërsa qeveria rajonale ka premtuar një raport mbi shkaqet e mundshme të kësaj ngjarjeje.

Në një postim në Facebook, Ministria e Mjedisit e Puntland informoi se banorët e zonës kanë arritur të shpëtojnë rreth 30 delfinë, duke i rikthyer ata në ujë.

“Numri i delfinëve të sjellë nga deti në breg ka arritur deri në 140, dhe shumica e tyre janë të ngordhur. Disa ende janë gjallë, por situata është tragjike. Nuk kemi parë kurrë diçka të tillë më parë,” – tha një dëshmitar okular, Abulachi Muse.

Autoritetet lokale dhe organizatat mjedisore po monitorojnë situatën dhe pritet një raport i detajuar mbi shkaqet e kësaj fatkeqësie.