Chiara Ferragni ka konfirmuar se vila e mrekullueshme Matilda, e ndodhur buzë liqenit të Comos, nuk është më pjesë e jetës së saj. Influencuesja e njohur italiane u pyet së fundmi për shtëpinë dhe dha një përgjigje të shkurtër, por domethënëse:

“Ishte e ish-burrit tim dhe ai po e shet.”

Vila Matilda, e quajtur sipas qenit të dashur të Ferragni-t, u konsiderua si shtëpia e ëndrrave për të dhe ish-bashkëshortin Fedez, ku planifikonin të kalonin kohë me fëmijët e tyre, Leone dhe Vittoria. Megjithatë, pas ndarjes së tyre, vila ka mbetur pothuajse e pabanuar.

Ndërkohë, Ferragni po e vijon jetën e saj sentimentale pranë Giovanni Tronchetti Provera, një trashëgimtar i njohur i një prej familjeve më të fuqishme të industrisë italiane. Lidhja e tyre po ndiqet me interes nga fansat dhe mediat, të cilët janë kuriozë për çdo detaj të romancës së re të influencueses së famshme.