Autoritetet greke kanë shpallur alarmin për zhdukjen e Ilir Zorbajt, një 49-vjeçar me origjinë shqiptare, i cili është parë për herë të fundit në zonën e Rizomylos, në rajonin e Ahaisë.

Sipas njoftimit zyrtar të organizatës “Buzëqeshja e Fëmijës”, Zorbaj është 1.75 metra i gjatë, trupdobët dhe me sy kafe. Ditën e zhdukjes, më 6 tetor 2025, ai ishte veshur me një xhaketë të zezë, xhinse dhe këpucë të bardha.

Familjarët e 49-vjeçarit njoftuan autoritetet disa ditë më vonë, dhe më 9 tetor, organizata humanitare publikoi një apel publik për ndihmë, pasi ekziston dyshimi se ai mund të jetë në rrezik për jetën.

“Buzëqeshja e Fëmijës” u ka bërë thirrje qytetarëve që kanë ndonjë informacion për vendndodhjen e Ilir Zorbajt të kontaktojnë menjëherë në linjat e emergjencës 100 ose 116000, në mënyrë që kërkimet të vazhdojnë pa vonesë.