Një valë helmimesh ushqimore po trondit Kalabrinë dhe më gjerë, pas dyshimeve për rastet e para të botulizmit të shkaktuar nga konsumimi i brokolit në vaj të kontaminuar. Në qendër të hetimeve është një kamion ambulant ushqimor në Diamante (Cosenza), ku janë blerë produktet e dyshuara.

Viktimat deri tani janë dy: Luigi Di Sarno, 52 vjeç, artist rrugor nga Cercola, dhe një grua 45-vjeçare nga Praia a Mare, ndërsa në spital janë shtruar nëntë persona të tjerë me simptoma të ngjashme. Të dy viktimat dyshohet të kenë konsumuar sanduiç me brokoli nga i njëjti shitës ambulant.

Hetuesit po shqyrtojnë gjithashtu përgjegjësitë mjekësore, pasi pacientët u trajtuan fillimisht në një klinikë private në Belvedere Marittimo, ku nuk u diagnostikua në kohë helmimi me toksinën botulinum. Ndërkohë, prokuroria në Kozencë ka nisur hetime për “vrasje si pasojë e një krimi tjetër” dhe “shitje ushqimesh të dëmshme”, duke urdhëruar sekuestrimin e kamionit ambulant dhe të gjithë produkteve të dyshuara.

Autoritetet lokale po nxisin konsumatorët që kanë blerë ushqime nga shitës ambulantë në zonën e Diamantes të lajmërojnë menjëherë institucionet shëndetësore.

Në kuadër të emergjencës, janë dërguar shishe antihelmi nga Farmacia Ushtarake dhe Spitali San Camillo në Romë, ndërsa Spitali Annunziata në Kozencë ka formuar një rezervë për trajtimin e pacientëve.

Ky rast vjen vetëm disa ditë pas një ngjarjeje të ngjashme në Sardenjë, ku një grua 38-vjeçare ndërroi jetë pas helmimit nga një salcë guacamole gjatë festivalit Fiesta Latina.

Hetimet vazhdojnë, ndërsa autoritetet paralajmërojnë përkujdesje maksimale ndaj produkteve ushqimore dhe masat për të parandaluar përhapjen e helmimeve në të gjithë vendin.