Alesia Balliu, anëtare e Partisë Demokratike, ka reaguar ashpër lidhur me procesin e primareve dhe përzgjedhjen e kandidatëve për Elbasanin. Ajo ka denoncuar se primaret ishin një farsë, duke thënë se në listën e mbyllur të këtij qarku u fut një individ pa kontribute të dukshme, ndërkohë që angazhimi i anëtarëve të PD për disa vite në kauzën opozitare është injoruar.

Në një intervistë televizive, Balliu ka theksuar se në një SMS të dërguar nga Flamur Noka, ishte pranuar që votat për një kandidat ishin siguruar nga Luçiano Boçi. Ajo ka shtuar se ajo vetë ka dhënë kontributin e saj për Partinë Demokratike, duke marrë pjesë në protestat kundër korrupsionit dhe duke luftuar në vijën e parë të opozitës.

Balliu ka theksuar gjithashtu se pas vizitës së Sali Berishës në Elbasan, ai sulmoi bandat, por në listën e mbyllur u futën individë të fisit Çapja, që janë të lidhur ngushtësisht me krimin e organizuar. Ajo e ka konsideruar këtë një padrejtësi, duke theksuar se kishte qenë pjesë e angazhimeve të shumta për PD dhe se nuk do ta mbështeste asnjë kandidat që kishte lidhje me krimin.

“Unë nuk pranoj të bëj fushatë mbi pazare dhe për ata që përfaqësojnë krimin,” ka thënë Balliu, duke shtuar se e ka luftuar qeverinë Rama dhe do të vazhdojë ta bëjë këtë për interesin e Shqipërisë dhe të qytetarëve të saj.