Ambasada Amerikane në Tiranë ka lëshuar një paralajmërim për qytetarët shqiptarë, duke zbuluar një skemë mashtrimi në të cilën disa individë, duke përdorur emrin e ambasadës, premtonin udhëtime falas dhe viza me kosto të ulët. Sipas deklaratës së ambasadës, është identifikuar një projekt i njohur si “Let’s Talk Together About US24,” që pretendon lidhje me ambasadën, por në realitet nuk ka asnjë lidhje me të, me Departamentin e Shtetit të SHBA, Departamentin e Arsimit të SHBA, programet arsimore ose personelin e ambasadës.

“Ambasada Amerikane paralajmëron se ky grup nuk ka asnjë lidhje me ta dhe i bën thirrje qytetarëve shqiptarë të jenë të kujdesshëm ndaj mashtrimeve që garantojnë udhëtime falas në Shtetet e Bashkuara, si dhe viza amerikane pa pagesë ose me kosto të ulët. Gjithashtu, u bëjmë thirrje kujtdo që të kontaktojë Ambasadën e SHBA nëse dyshon se ndonjë person ose organizatë përpiqet të paraqesë veten në mënyrë të gënjeshtërt si të lidhur me ambasadën,” thuhet në deklaratën e ambasadës.

Pas hetimeve intensive dhe bashkëpunimit me Policinë e Shtetit, është identifikuar dhe vënë nën hetim drejtoresha e një qendre arsimore, V. L., e cila dyshohet të jetë një nga personat kryesorë pas skemës mashtruese. Kjo qendër arsimore u merrte para qytetarëve, duke u premtuar mundësi studimi në SHBA me bursa përmes projektit të rremë “Let’s Talk Together About US24.”

Pas arrestimit të saj, policia ka ushtruar kontroll në banesën e V. L., e cila është një zyrtare arsimore në nivel vendor dhe pjesë e Drejtorisë së Përgjithshme të Arsimit Parauniversitar në Ministrinë e Arsimit. Ajo është nën hetim së bashku me një tjetër person me inicialet K. J., të dyshuar për krijimin e skemës dhe falsifikimin e dokumenteve për të ofruar bursa të rreme për studentët.

Shërbimi i Sigurisë Diplomatike i Departamentit të Shtetit të SHBA po vazhdon të punojë ngushtë me Policinë e Shtetit për të hetuar përmasat e kësaj skeme mashtruese dhe për të ndëshkuar të gjithë ata që janë përfshirë në këtë aktivitet të paligjshëm.