Ambasadori i Bashkimit Evropian në Shqipëri, Silvio Gonzato, ka reaguar sot nga Elbasani lidhur me bojkotin e institucioneve të drejtësisë ndaj komisionit “Xhafaj”. Gonzato bëri apel për respektimin e pavarësisë së këtyre institucioneve, duke theksuar se Bashkimi Evropian do të vazhdojë të asistojë komisionin “Xhafaj” në konsolidimin e Reformës në Drejtësi.

“Në fakt, nuk mendoj se situata është ashtu siç po raportohet. Mendoj se institucionet e drejtësisë kanë patur një mendim tjetër, që ndoshta është interpretuar ndryshe nga media. E kam fjalën për Këshillin e Lartë Gjyqësor, Këshillin e Lartë të Prokurorisë, SPAK-un dhe Inspektorin e Lartë të Drejtësisë. Pavarësia e institucioneve të drejtësisë duhet të respektohet dhe kërkohet kontributi i tyre për konsolidimin e Reformës në Drejtësi, që u miratua në vitin 2016,” tha Gonzato.

Ai shtoi se BE-ja do të vazhdojë të ofrojë ekspertizë për përshpejtimin e përpjekjeve kundër korrupsionit dhe për përmirësimin e qeverisjes, duke i dhënë rëndësi vazhdimit të reformës.

Duke u ndalur në situatën e tensionuar në Kuvend dhe incidentin e opozitës me djegien e karrigeve, Gonzato u shpreh: “Besoj se opozita ka mënyra të ndryshme për të denoncuar mungesën e demokracisë, dhe nuk mendoj se djegia e karrigeve është mënyra më efikase për ta bërë këtë.”

Këto deklarata Gonzato i bëri gjatë një vizite në Elbasan, ku së bashku me Ministrin e Brendshëm, Ervin Hoxha, vizituan një biznes social, ambientet e të cilit i janë sekuestruar një eksponenti të krimit të organizuar në Elbasan, rreth tre vite më parë.