Presidenti i Shtetet e Bashkuara të Amerikës, Donald Trump, ka kërcënuar me sulme të tjera ndaj qendrës kryesore të eksportit të naftës së Iranit, Ishulli Kharg, duke deklaruar se nuk është ende i gatshëm për një marrëveshje me Teheranin për t’i dhënë fund konfliktit.

Me luftën mes SHBA-së dhe Izraelit kundër Iranit që ka hyrë në javën e tretë, Trump tha se sulmet amerikane kanë “shkatërruar plotësisht” një pjesë të madhe të ishullit dhe paralajmëroi se mund të ndërmerren sulme të tjera.

“Mund ta godasim atë edhe disa herë vetëm për qejf”, tha Trump në një intervistë për NBC News.

Deklaratat e presidentit amerikan shënojnë një përshkallëzim të fortë të retorikës, pasi më herët ai kishte thënë se objektivat amerikane në Kharg ishin vetëm instalime ushtarake. Konflikti, i cili është përhapur në të gjithë Lindjen e Mesme, raportohet se ka shkaktuar mbi 2 mijë viktima, kryesisht në Iran dhe Liban.

Ndërkohë, sipas burimeve të cituara nga Reuters, Uashingtoni ka lënë mënjanë përpjekjet e disa aleatëve të rajonit për të hapur negociata. Nga ana tjetër, Garda Revolucionare e Iranit deklaroi se ka lëshuar raketa drejt Izraelit dhe tre bazave amerikane në rajon.

Trump ka paraqitur një sërë kërkesash për Teheranin, përfshirë ndërprerjen e programeve bërthamore dhe balistike. Ai tha për NBC se Irani mund të jetë i gatshëm për një marrëveshje për t’i dhënë fund luftimeve, por shtoi se “kushtet nuk janë ende mjaftueshëm të mira”.

Në intervistë, Trump përmendi gjithashtu mundësinë që Udhëheqësi Suprem iranian, Mojtaba Khamenei, mund të jetë vrarë, por ministri i Jashtëm i Iranit, Abbas Araghchi, deklaroi se ai është në gjendje të mirë shëndetësore dhe po menaxhon situatën.