Ministrja e Financave, Delina Ibrahimaj ka deklaruar se amnistia fiskale është ende në diskutim dhe nuk ka një datë kur do të miratohet.

Në përfundim të mbledhjes së sotme të qeverisë, ajo u shpreh se paralelisht po punohet edhe me aktet nënligjore, në mënyrë që ligji kur të miratohet të jetë i plotësuar.

“Amnistia fiskalë është një ligj i veçantë dhe nuk është parashikuar në pr/ buxhetin që sapo u miratua. Është në konsultim me partnerët tanë, me palët e interesit dhe nuk kemi një datë për miratimin  këtij ligji. Ne po punojmë që paralelisht me këtë të hartojmë aktet nënligjore që kurdo që të arrijmë në një ligj final të kemi gati infrastrukturën për procedurat e kërkuara”, u shpreh ministrja.

Ajo u pyet edhe për takimin në Këshillin e Sigurisë Kombëtare, duke thënë se tek presidenti u raportua për masat e marra.

“Në fakt është roli i Presidentit që të thërrasë këshillin e sigurisë për çështje të ndryshme, diskutuam për situatën aktuale, ku çdo institucion raportoi për masat e marra, nivelin e goditjes dhe masat që do të merren për të parandaluar sulmet që mund të vijnë në të ardhmen”.