Andrea Mano pritet të marrë mandatin e deputetit pas dënimit të Ervin Salianjit me 1 vit burg lidhur me çështjen e njohur si “Babale”. Vendimi i Apelit, i cili la në fuqi vendimin e Shkallës së Parë, ka bërë që Salianji të humbasë mandatin e tij parlamentar, duke u bazuar në nenin 71.1 të Kushtetutës, i cili përcakton se një deputet e humb mandatin kur dënohet me një vendim gjyqësor të formës së prerë për kryerjen e një krimi.
Sipas ligjit të dekriminalizimit, Salianji i ndalohet të rikandidojë në zgjedhje për të paktën pesë vjet. Ai ishte shpallur fajtor nga Gjykata e Shkallës së Parë në vitin 2019 për akuzën e ‘Kallëzimit të Rremë’ dhe ishte dënuar me 1 vit heqje lirie. Prokuroria argumentoi se dy audio përgjimet që Salianji publikoi në vitin 2018, ku pretendohej se Geron Xhafaj, vëllai i ministrit të Brendshëm të asaj kohe, Fatmir Xhafaj, ishte i përfshirë në trafikimin e lëndëve narkotike, ishin të montuara. Në këtë çështje ishin të përfshirë gjithashtu edhe Fredi Alizoti, Albert Veliu dhe Jetmir Olldashi.
Me këtë situatë, Andrea Mano, i cili do të zëvendësojë Salianjin, do të hyjë në Parlament, duke përfaqësuar kështu vazhdimësinë e Partisë Demokratike në Kuvend.
