Ambasada e SHBA ka përshëndetur betimin e anëtarit të 8 të Gjykatës Kushtetuese, Sandër Beci. Me anë të një postimi në rrjetet sociale, ambasada thotë se kjo përfaqëson përparimin e pandalshëm të Reformës në Drejtësi.

Po ashtu ambasada thekson se reforma në drejtësi do të vijojë të ecë përpara.

“SHBA mirëpret betimin e sotëm të anëtarit të 8-të të Gjykatës Kushtetuese, çka përfaqëson përparimin e pandalshëm të Reformës në Drejtësi & bashkëpunimin e vazhdueshëm të institucioneve shqiptare. Reforma në Drejtësi vijon të ecë përpara”, thuhet në njoftimin e ambasadës.

Anëtari i Gjykatës Kushtetueses Sandër Beci u betua sot para presidentit të Republikës Ilir Meta.

“Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”, tha Beci para kreut të shtetit me dorën mbi Kushtetutën e Shqipërisë.

Meta i uroi suksese kreut Sandër Becit në detyrën e tij të ri si anëtar i Gjykatës Kushtetuese.

Në ceremoninë solemne të betimit ishin të pranishëm përfaqësues të Kuvendit të Shqipërisë, Gjykatës Kushtetuese, Avokatit të Popullit, Gjykatës së Lartë, Kabinetit të Presidentit, dhe të misionit të ekspertizës OPDAT në vendin tonë, që mbulon çështjet e drejtësisë.